Nasikop sa buy-bust operation sa kapulisan ang usa ka giilang High-Value Individual o HVI human makumpiskar ang gibanabanang 800 gramos nga gituohang shabu nga nagkantidad og ₱5.44 milyon sa Barangay 22, Bacolod City, alas-9:17 sa gabii niadtong Nobyembre 13, 2026.
Giila ang suspek sa alyas nga “Tom,” 44 anyos, ug nagtrabaho isip room boy sa usa ka pension house. Gipangunahan sa Police Station 1 sa Bacolod City Police Office, uban sa City Drug Enforcement Unit, ang operasyon human makadawat og impormasyon gikan sa usa ka confidential informant kalabot sa giingong kalihokan sa suspek.
Gawas sa mga pakete sa gituohang shabu, narekober usab ang buy-bust money ug usa ka paper bag. Kustodiya karon sa kapulisan ang suspek samtang giandam ang kasong paglapas sa Republic Act 9165 o Comprehensive Dangerous Drugs Act of 2002.
Gipasalig ni PRO-NIR Regional Director PBGEN Rudecindo Reales nga magpadayon ang ilang operasyon batok sa ilegal nga droga sa Negros Island Region.
Photo courtesy: PNP Police Regional Office Negros Island Region










