Nagpasidaan ang Department of Social Welfare and Development (DSWD)-11 nga posibleng mosaka ang ihap sa mga batang mapugos sa pagtrabaho o mahimong biktima sa child labor tungod sa padayong pagsaka sa presyo sa mga palaliton ug kalisod sa panginabuhi sa pipila ka pamilya.
Gipadayag ni DSWD-11 Child Labor Focal Person Hannah Princess Taguinod ang maong kabalaka atol sa usa ka forum nga gipahigayon sa Tagum Madayaw Hotel niadtong Nobyembre 6, 2026.
Matod ni Taguinod, nagpadayon pa ang profiling sa ahensya aron matino ang aktuwal nga ihap sa mga batang nalambigit sa child labor sa Davao Region karong tuiga.
Giklaro usab sa DSWD-11 nga ang 3,819 ka bata nga natala sa rehiyon gibase sa 2025 profiling nga gihimo sa Department of Labor and Employment (DOLE) ug mga Public Employment Service Office (PESO).
Gilauman sa ahensya nga pinaagi sa padayong pagmonitor, interbensyon ug pagpalig-on sa mga programa sa panginabuhian alang sa mga pamilya, mapugngan ang pagdaghan sa mga batang mameligro nga mosulod sa child labor.
Photo Courtesy: DSWD XI – Davao Region
