Gidayeg sa Davao Prison and Penal Farm (DPPF) ang City Training Center-IGACOS (CTC-IGACOS) isip usa sa ilang mga kauban nga organisasyon nga naghatag og suporta sa mga programa alang sa pagbag-o ug rehabilitasyon sa mga Persons Deprived of Liberty (PDLs).
Gihatag ang pag-ila niadtong ulahing bahin sa Oktubre 2026, atol sa pagsaulog sa ika-32 National Correctional Consciousness Week nga gipahigayon sa DPPF New Conference Room, ubos sa temang “Makataong Hustisya: Paglaya na may Dangal at Pag-asa.”
Giila ang CTC-IGACOS tungod sa padayon nga paghatag og kahigayonan sa mga PDLs nga makakat-on og mga kahanas nga magamit sa pagpangita og panginabuhian ug pagbalik sa komunidad.
Sa pagkakaron, nagpatuman ang CTC-IGACOS og pagbansay sa Masonry, Tile Setting ug Photovoltaic (PV) Systems Installation NC II sulod sa DAPECOL aron maandam ang mga PDL sa mas produktibong panginabuhi human sa ilang pagkabilanggo.
Photo Courtesy: TESDA Davao Region
