Pormal nang gisugdan sa Island Garden City of Samal (IGACOS) City Jail ang pagsaulog sa National Correctional Consciousness Week (NACOCOW) 2026, nga nagtumong sa pagpalig-on sa tawhanong pagserbisyo, rehabilitasyon ug pagbag-o sa kinabuhi sa mga Persons Deprived of Liberty (PDL).
Gisubay sa kalihokan ang tema nga “Makataong Paglilingkod, Makabuluhang Rehabilitasyon, Pagbabagong may Layunin.” Lakip sa mga kalihokan ang Parade of Teams nga nagpakita sa panaghiusa ug aktibong partisipasyon sa mga miapil.
Mitambong isip guest speaker si City Councilor Clavel Ann David, nga mipaambit og mensahe sa pagsuporta sa maong selebrasyon. Kabahin usab sa programa ang Balaang Misa nga gipangulohan ni Fr. Sanny Cantila sa Mary’s Little Children Community, diin gipasiugda ang pag-ampo, pagpasalamat ug paglaom alang sa personal nga pagbag-o.
Samtang gipahigayon usab ang Family Day diin nagtapok ang mga PDL ug ilang mga pamilya alang sa panag-uban ug salo-salo. Pinaagi niini, gihatagan og importansya ang papel sa pamilya isip tinubdan sa gugma, pagdasig ug suporta sa proseso sa rehabilitasyon. Matod sa IGACOS City Jail, pinaagi sa NACOCOW 2026, padayon nilang gipalig-on ang pagserbisyo nga adunay dignidad ug malasakit, uban ang pagtuo nga ang matag tawo adunay kahigayonan nga magbag-o ug magsugod pag-usab.
Photo Courtesy: Igacos City Jail
