Nakadawat og Medalya ng Kasanayan o PNP Efficiency Medal si PLTCOL Edgardo Galleto Bahan, hepe sa Tagum City Police Station ubos sa Davao del Norte Police Provincial Office, atol sa flag-raising ceremony niadtong Oktubre 26, 2026, alas 7:30 sa buntag, sa PRO 11 Parade Ground, Camp Sgt. Quintin M. Merecido, Buhangin, Davao City.
Gihatag ang maong pasidungog isip pag-ila sa iyang mahinungdanong serbisyo ug pagpangulo sa Tagum City Police Station, nga nakab-ot ang unang ranggo isip labing maayong nagpasundayag nga police unit sa kampanya batok sa mga armas nga walay legal nga dokumento atol sa ikatulong kwarter sa tuig 2026. Pinaagi niini nga pasidungog, gipasiugda ang padayong paningkamot sa Tagum City Police Station sa pagpatuman sa mga programa alang sa kalinaw, kahusay ug kaluwasan sa katawhan.
Gilaoman usab nga magpadayon ang ilang hugot nga kampanya batok sa ilegal nga mga armas aron mapanalipdan ang komunidad.
Photo Courtesy: TCPS
