Naskamit sa kapulisan ang 57.19 gramos nga gidudahang shabu nga nagkantidad og ₱388,892 ug nadakpan ang usa ka 31-anyos nga job order nga empleyado sa lokal nga kagamhanan sa Escalante City atol sa buy-bust operation sa Barangay Balintawak, alas-6 sa buntag niadtong Oktubre 24, 2026.
Giila ang suspek sa alyas “Romulo,” minyo ug residente sa maong lugar. Sumala sa inisyal nga taho, nakuha gikan sa suspek ang gidudahang ilegal nga droga human sa transaksiyon nga nagkantidad og ₱6,500, diin ₱100 lamang ang tinuod nga kuwarta ug ang nahibilin peke o boodle money.
Narekober usab sa mga operatiba ang mga gamit nga gidudahang may kalabotan sa ilegal nga droga. Gihulat pa ang resulta sa laboratory examination sa nakumpiskar nga substansiya aron mapadayon ang pagpasaka sa tukmang kaso batok sa suspek. Gilaoman nga mapasaka ang kaso sa Lunes, Oktubre 26, kon makompleto na ang gikinahanglang resulta ug mga dokumento.
