Gidunggab ang usa ka 34-anyos nga lalaki samtang natulog sa iyang payag sa Purok 3, Sitio Apalili, Barangay Colosas, Paquibato District, Davao City, alas-3:00 sa hapon niadtong Martes, Oktubre 20, 2026.
Ang biktima nailhang si alyas Ipit, nga naangol sa wala nga bahin sa tiyan. Nadiskobrehan siya sa iyang igsuon nga nagbuy-od ug nagkadugo.
Matod sa biktima, ang midunggab kaniya mao si alyas Alberto, 56 anyos, taga-Barangay Candiis, Magsaysay, Misamis Oriental, nga temporaryong nagpuyo sa maong lugar.
Base sa inisyal nga imbestigasyon sa kapulisan, dugay nang adunay panagbangi ang biktima ug ang suspek, nga gituohang hinungdan sa pagpangdunggab. Daling gidala sa ospital ang biktima alang sa medikal nga pag-atiman, samtang gipangita na sa kapulisan ang suspek nga mikalagiw human sa insidente.
Photo courtesy:DCPO
