Nag-andam ug kinatibuk-ang ₱140 milyon nga pondo ang Lokal nga Panggamhanan sa Valencia City alang sa emerhensiya batok sa posibleng epekto sa Super El Niño.
Base sa pamahayag ni City Administrator Atty. Heinz Guderian Villanueva, naglangkob sa maong pondo ang ₱40 milyon nga Quick Response Fund (QRF) ug ₱100 milyon nga dugang pondo aron magamit sa pagpalit og mga water tank, water pump para sa mga mag-uuma, ug pinansiyal nga tabang sa mga maaapektahang residente.
Aron mapalig-on ang aksyon sa dakbayan, nagmugna si City Mayor Amie Galario ug ‘El Niño Task Force’ pinaagi sa usa ka Executive Order aron masumpay ug mapadali ang koordinasyon sa nagkalainlaing opisina sama sa CDRRMO ug CHO. Plano usab sa maong task force ang pagpagawas og sinemanang bulletin sa opisyal nga Facebook page sa LGU aron maghatag ug pinakabag-ong impormasyon bahin sa kahimtang sa ting-init sa siyudad.
Kabahin usab sa ilang pagpangandam ang pag-apod-apod og mga vegetables seedlings ug organikong abono atol sa Farmers’ Month karong Oktubre 28 aron madasig ang container vegetable gardening isip alternatibong pamaagi nga tinubdan sa pagkaon. Andam usab ang kagamhanan, nga magpatuman og water rationing kung gikinahanglan.
Photo courtesy: LGU Valencia City
