Gisugdan na ang pagtukod sa Tantangan District Hospital sa Barangay Poblacion, Tantangan, South Cotabato, samtang laing ₱50 milyones ang gigahin alang sa Manuel C. Callejo–City of Koronadal Infirmary Hospital sa Barangay Rotonda, Koronadal City. Adunay ₱50 milyones nga pondo ang Tantangan District Hospital, diin ₱45 milyones ang alang sa konstruksyon ug ₱5 milyones alang sa medical equipment.
Sa unang hugna sa proyekto, tukoron ang pasilidad nga may sukod nga 1,728 square meters nga maglangkob sa administrative office, laboratoryo ug emergency area. Gidumala sa Provincial Government of South Cotabato ang pagpatuman sa proyekto.
Gipasalig usab ang laing ₱50 milyones alang sa pagtukod sa Manuel C. Callejo–City of Koronadal Infirmary Hospital, nga aduna usab pondo alang sa konstruksyon ug mga kagamitang medikal. Gikalipay ni Tantangan Mayor Timee Gonzales ang proyekto, nga iyang gihulagway nga dugay nang pangandoy sa lungsod, ug nagpasalamat kang Governor Reynaldo S. Tamayo Jr. sa pagsuporta niini.
Sumala ni Tamayo, kabahin ang duha ka proyekto sa pagpalig-on sa paghatod sa serbisyong panglawas ngadto sa mga residente, ilabina sa mga nanginahanglan og medikal nga tabang panahon sa emerhensiya.
Gipahibalo usab sa gobernador ang plano nga magbutang og kapin o mokabat sa 15,000 ka provincial health navigators sa nagkadaiyang purok sa probinsya, uban sa tumong nga adunay usa ka health worker sa matag 20 ka panimalay.
Gipasiugda ni Tamayo nga ang panaghiusa sa mga mayor sa tibuok South Cotabato ug ang pagtipon sa pondo sa lokal nga pangagamhanan maoy importanteng lakang sa pagpatuman sa Universal Health Care program. Ang duha ka proyekto gisuportahan sa Melco Foundation, nga nagdugang sa tabang niini alang sa sektor sa panglawas ngadto sa ₱200 milyones karong tuiga, human makahatag og ₱100 milyones alang sa edukasyon niadtong 2024.
Gilauman nga sa dihang mahuman, mas mapaduol sa mga residente sa Tantangan ug Koronadal City ang mga pasilidad sa ospital ug serbisyong medikal.
Photo courtesy: PLGU South Cotabato
