Mitubo og 4.10 porsyento ang ekonomiya sa Zamboanga del Norte niadtong 2025, mas taas gamay kumpara sa 4.09 porsyentong growth niadtong 2024, base sa datos sa Philippine Statistics Authority o PSA.
Gibanabana sa PSA nga miabot sa 130.26 bilyon pesos ang Gross Domestic Product o GDP sa probinsya niadtong 2025, gikan sa 125.13 bilyon pesos niadtong 2024. Lakip sa pinakapaspas mitubo nga industriya ang wholesale ug retail trade, apil ang pag-ayo sa mga sakyanan ug motorsiklo nga mitubo og 14.7 porsyento.
Misunod niini ang public administration ug defense nga mitubo og 11.9 porsyento, samtang ang human health ug social work activities mitubo og 10.9 porsyento. Mitubo usab ang edukasyon og 10.1 porsyento, financial ug insurance activities og 7.3 porsyento, ug transportation ug storage og 6.9 porsyento.
Apan dili tanang sektor nakasinati og pagtubo. Ang agrikultura, forestry ug fishing mikunhod og 2.0 porsyento, samtang mas dako ang pagkunhod sa construction nga niabot sa 7.8 porsyento. Sa laing bahin, ang per capita GDP sa Zamboanga del Norte niabot sa 120,709 pesos, o 3.5 porsyentong pagtaas kumpara sa miaging tuig.
Photo courtesy: Wikipedia
