Gilusad sa DMW region IX ang bayanihan para sa balikbayang manggagawa caravan dinhi sa Dakbayan sa Dipolog, Zamboanga del Norte, adlawng Biyernes, Oktubre 2, 2026.
Ang maong kalihukan nagtanyag sa OFW Employment, Skills Development, and Reintegration Caravan 2026 pinaagi sa pakigtambayayong sa Overseas Workers Welfare Administration o OWWA. Miduyog usab ang 22 ka mga ahensya sa gobyerno aron mahatagan og lain-laing serbisyo ug programa ang mga katawhan.
Apil usab sa caravan ang mga pribadong kompanya nga nag-offer og mga oportunidad sa trabaho, ilabina ang pito ka private recruitment agencies nga nagdala og kapin 15,000 ka verified, legal ug safe nga overseas job opportunities alang sa mga interesado nga mangita og trabaho sa gawas sa nasud.
Nanguna sa maong kalihukan si Atty. Hans Leo J. Cacdac, Secretary sa Department of Migrant Workers o DMW, kauban ang mga opisyal gikan sa regional ug national nga opisina. Sa iyang welcome message, gipasiugda ni Cacdac nga ang sukdanan sa public service dili lamang kung kinsa ang moduol sa mga opisina, kondili kung pila ka mga tawo ang ilang maabot ug mahatagan og serbisyo pinaagi sa pagduol mismo ngadto sa katawhan.
Gipasiugda usab ni Cacdac nga padayon ang mando sa administrasyon nga walay OFW nga pasagdan ug kinahanglan masiguro nga mahatagan sila sa angay nga proteksyon, tabang ug serbisyo.
Mihatag usab og inspirational message si 2nd District Congresswoman Irene “Ate Ai” Labadlabad, diin iyang gipasalamatan si Secretary Cacdac sa iyang dedikasyon sa pagtabang ug pag-atiman sa mga kababayan nga nagbangutan tungod sa pagtaliwan sa ilang mga minahal sa kinabuhi didto sa Middle East.
Lakip sa mga gipahigayon atol sa caravan ang turnover sa assistance, turnover sa livelihood kits pinaagi sa DILP, ug TUPAD payout alang sa mga benepisyaryo.
