Kritikal ang kahimtang sa duha ka tuig nga batang lalaki human kini nahulog sa septic tank sa Purok 6, Barangay Gatub, Lakewood, Zamboanga del Sur, adlawng Huwebes, Setyembre 17,2026
Base sa inisyal imbestigasyon, wala namatikdi sa mga ginikanan ang bata nga niadto sa likod nga bahin sa ilang balay diin nahimutang ang bangag sa septic tank.
Wala madugay, aksidenteng nahulog ang bata ngadto sa septic tank, mga alas-1:50 sa hapon ug nadiskubrehan sa amahan ang bata nga wala nay panimuot sulod sa septic tank.
Dali usab nga miresponde ang mga personnel sa Lakewood Municipal Disaster Risk Reduction and Management Office (MDRRMO), ug mihimo dayon og resuscitation efforts aron matabangan ang bata.
Gidala dayon ngadto sa Tigbao Rural Health Unit alang sa medikal nga pagtagad, human niini, gibalhin ang bata ngadto sa Zamboanga del Sur Medical Center sa Dao, Pagadian City, alang sa dugang nga medikal nga pagtambal.
Sa pagkakaron, padayon pang gimonitor sa mga doktor ang kahimtang sa bata, tungod sa daghang tubig nga nainom, ug seryosong kahimtang niini.
