Tulo ka giila nga High-Value Targets (HVTs) ang nasikop sa pagpatuman sa search warrant sa usa ka gi-alagarang drug den sa Barangay Mabua, Tandag City, Surigao del Sur niadtong nakalabay nga adlaw.
Ang operasyon gipahigayon sa mga personnel sa Tandag Component City Police Station o TCCPS, ubos sa pagpangulo ni PLTCOL Junyd D. Marohom, Acting Chief of Police, uban sa koordinasyon sa Surigao del Sur Provincial Drug Enforcement Unit (SDS-PDEU) ug Philippine Drug Enforcement Agency o PDEA-Surigao del Sur. Nasikop sa operasyon ang tulo ka HVT nga giila lamang sa ilang mga alyas nga “Lolong,” “Yani,” ug “Maria.”
Atol sa pagpatuman sa search warrant, narekober sa mga otoridad ang walo ka heat-sealed transparent plastic sachets nga adunay sulod nga gituohang shabu, nga adunay kinatibuk-ang gibug-aton nga 10 gramos. Narekober usab ang nagkalain-laing drug paraphernalia ug uban pang mga ebidensya nga gituohang may kalabutan sa operasyon.
Gibanabanang mokabat sa 68,000 pesos ang Dangerous Drugs Board (DDB) market value sa nakumpiskang gituohang ilegal nga droga. Gidala na sa Tandag CCPS ang mga nasikop ug ang mga narekober nga ebidensya alang sa hustong dokumentasyon ug disposisyon, samtang ang gituohang shabu gipailalom sa tukmang laboratory examination ug disposisyon subay sa gitakdang pamaagi.
Photo courtesy: Tandag CCPS
