Gipusil patay sa labing menos tulo ka armadong lalaki ang usa ka american national nga anaa sa edad 70-anyos ug iyang Filipinang asawa human gisulong ang ilang giabangan nga balay sa Barangay Bajumpandan, Dumaguete City, sayo niadtong Miyerkules, Septiyembre 2, 2026. Giila ang mga biktima nga sila Mark Duell ug Elsie Duell parehong anaa sa kapin 70 ang panuigon.
Sumala sa Negros Oriental Police Provincial Office (NOrPPO), misulod ang mga suspek sa maid’s quarters wala pa molapas ang tungang gabii ug gipangayo ang kwarta sa magtiayon samtang gitutokan og armas ang ilang helper. Giposasan usab sa mga suspek ang helper sa wala pa sila miadto sa main house.
Nasayran nga pasado alas 6:00 sa buntag, napalgan nga wala nay kinabuhi ang magtiayon sa sala sa ilang balay. Parehong nakaangkon og daghang samad pinusilan ang mga biktima gikan sa armas nga wala pa matino ang kalibre.
Gitumbok sa Imbestigador ang duha ka Person of Interest, samtang gipalawman sa kapulisan ang ilang imbestigasyon aron matino ang motibo ugmailhan ang responsable sa krimen.
Gipabilin ubos sa kustodiya sa kapulisan ang helper isip importanteng saksi, samtang nagpadayon ang pagproseso sa crime scene ug pagpangolekta sa ebidensiya. Gipasaligan usab sa police leadership sa Negros Oriental ang publiko nga pangitaon ug panubagon ang mga responsable sa pagpatay sa magtiayon.
Photo Courtesy: Philippine News Agency
