Gipakita ang talagsaong kalami ug kalidad sa lokal nga durian sa Tagum City atol sa “Durian Triumph: Defining the Best” Competition nga gipahigayon niadtong Agosto 29, 2026, sa Tagum City Trade and Exhibition Center sa Rotary Park, isip kabahin sa pagsaulog sa Durian Festival 2026.
Walo ka entries gikan sa mga lokal nga durian growers sa Tagum ang miapil sa maong kompetisyon, diin gihatagan og higayon ang mga mag-uuma sa pagpakita sa kalidad ug kalainan sa ilang mga produktong durian.
Gisalmutan ang kompetisyon sa mga miyembro sa Tagum City Durian Growers Association o TaCDuGA, diin hugot nga gisusi ug gitimbang ang mga entries, base sa nagkalain-laing sukdanan sama sa kabug-at sa durian, kadaghanon sa unod, ug ilabina ang katam-is niini.
Sumala sa mga organizers, tumong sa maong kompetisyon nga mailhan ang mga de-kalidad nga klase sa durian nga adunay labing maayong lasa ug kalidad.
Gilauman usab nga makatabang kini sa mga lokal nga mag-uuma sa pagpili sa angay nga mga binhi ug semilya alang sa ilang mga uma, aron mas mapalambo pa ang produksyon sa durian sa giingong syudad.
Sa resulta sa kompetisyon, nakuha sa Tebar Farm ni Alan Tebar ang dungog nga Pinaka Mabigat, samtang ang Unifarm ni kanhing gobernador sa Davao de Oro Arturo Uy ang midaog sa kategoriya nga Pinaka Malaman.
Gideklarar usab nga Pinaka Matamis ang entry sa Bacuring Farm ni Alexander Cabonce. Samtang ang Pinakataas nga dungog nga Durian Triumph gipaila usab ngadto sa Tebar Farm ni Alan Tebar, nga nakapakita sa kinatibuk-ang kamaayo sa ilang entry.
Gilauman nga pinaagi sa maong kompetisyon, mas mailhan ug mapasigarbo ang mga de-kalidad nga durian nga gipatubo sa mga lokal nga mag-uuma sa Tagum City, samtang mas mapalig-on ug mapalambo pa ang industriya sa durian ning dakbayan.
Photo Courtesy: City Government of Tagum
