Giprioridad sa SOCSKSARGEN Federation of Fishing and Allied Industries, Inc. (SFFAII) ang pagpahigayon sa 6th All-About Handline Summit imbis nga ipadayon ang 2026 National Tuna Congress alang sa pagsaulog sa Tuna Festival 2026, isip tubag sa dagkong hagit nga giatubang sa industriya sa pangisda.
Sumala kang Rosanna Bernadette Contreras, Executive Director sa SFFAII, gihimo ang maong desisyon niadtong Abril, pipila lang ka semana human misugod ang krisis sa presyo sa gasolina nga dakong nakaapekto sa operasyon sa mga mangingisda.
Matud ni Contreras, niadtong panahona, adunay mga adlaw nga adunay mga sakayan nga dili na makapangisda tungod sa taas nga gasto sa operasyon ug presyo sa fuel. Tungod niini, nakadesisyon ang federation nga i-optimize ang ilang limitado nga resources ug iprioridad ang Handline Summit, nga ilang gipahigayon sulod na sa miaging lima hangtod unom ka tuig kauban sa National Tuna Congress.
Gipasabot nga ang Handline Summit nagpunting sa mga panginahanglan sa handline fishers, lakip ang mga municipal ug commercial fishers, ilabina sa panahon nga mas nanginahanglan sila og suporta tungod sa mga hagit sa industriya.
Niadtong Abril 25, nagpahigayon na ang SFFAII og organizing meeting alang sa summit, ug sa unang semana sa Mayo, nakigkoordinar kini sa ilang mga partner, lakip ang Local Government Unit sa General Santos City, alang sa suporta sa kalihokan.
Gipasalamatan ni Contreras ang LGU-General Santos City tungod sa padayon nga suporta niini sa kalihokan. Giklaro usab sa SFFAII nga dili tungod sa pagkunhod sa budget alang sa festival ang pag-ilis sa prayoridad gikan sa National Tuna Congress ngadto sa Handline Summit.
Matud pa niya, nagpabilin ang parehas nga lebel sa suporta sa LGU-General Santos City alang sa kalihokan, sama sa suporta nga gihatag niini sa National Tuna Congress.
Gibutyag sa federation nga ang maong adjustment usa ka estratehikong lakang aron mas matutokan ang mga handline fisher ug ang ilang mga panginahanglan taliwala sa nagpadayong mga hagit sa industriya sa pangisda.
