Gipasiugda sa Philippine Rubber Research Institute (PRRI) ang importansya sa Training of Trainers (TOT) isip usa ka programa nga nagtumong sa pagpalig-on sa kahibalo ug kapasidad sa mga Agricultural Extension Workers nga nagtabang sa mga mag-uuma sa goma. Matud ni Engr. Evangeline P. Garcia, Training Specialist IV, pinaagi niini nga training, mas maandam ang mga trainer sa paghatod sa hustong impormasyon ug teknolohiya ngadto sa rubber farmers.
Lakip sa tumong sa maong training ang paghatag og dugang kahibalo sa mga Agricultural Extension Workers bahin sa mga bag-ong teknolohiya, pamaagi sa pag-atiman sa rubber, ug mga praktis nga makatabang sa pagpauswag sa produksiyon. Ang mga nakadawat sa training mahimong gamiton ang ilang nakat-onan sa pagtabang ug pag-guide sa mga mag-uuma sa ilang tagsa-tagsa ka komunidad.
Naglangkob usab ang training sa nagkalain-laing modules nga may kalabotan sa rubber production, improved farming technologies, ug husto nga pagdumala sa rubber plantation. Pinaagi sa hands-on learning ug pagpaambit sa teknikal nga kahibalo, gilauman nga mas epektibong ma-transfer ngadto sa mga mag-uuma ang mga teknolohiya nga gipasiugda sa PRRI.
Importante usab ang padayon nga pag-monitor ug pag-follow-up aron maseguro nga ang mga teknolohiya nga nakat-onan dili kutob sa training, kundili aktuwal nga magamit ug mapadayon sa mga rubber farmers. Sa paggamit sa mas maayong pamaagi sa pagpananom ug pag-atiman sa goma, gilauman nga molambo ang produksiyon, mapauswag ang kalidad sa produkto, ug maminusan ang mga problema nga mahimong makaapekto sa panginabuhian sa mga mag-uuma.
Sa mensahe ni Engr. Garcia, giawhag ang mga rubber farmers ug Agricultural Extension Workers nga padayon nga mangita og kahibalo, mosuway sa mga bag-ong teknolohiya, ug makig-alayon sa mga programa sa PRRI. Pinaagi sa panaghiusa sa mga eksperto, extension workers ug mag-uuma, mas mapalig-on ang rubber industry ug mas mapauswag ang panginabuhian sa mga pamilyang nagsalig sa pagpananom og goma.
