Balhog na sa prisohan ang 29-anyos nga lalaki nga giila nga si alyas “Win,” usa ka Most Wanted Person nga nag-atubang og duha ka kaso nga may kalabotan sa ilegal nga droga.
Gipatuman sa kapulisan ang duha ka warrant of arrest batok sa akusado niadtong Oktubre 15, 2026, sulod sa custodial facility sa Digos City Police Station.
Gipangunahan sa Digos City Police Station, ubos sa pagdumala ni Police Lieutenant Colonel Norman Yparraguirre, ang operasyon kauban ang kapulisan sa Don Carlos, Bukidnon, ug ubang police units sa Davao del Sur.
Ang mga warrant giluwatan sa Regional Trial Court sa Malaybalay City, Bukidnon, kalabot sa giingong paglapas sa Sections 5 ug 11 sa Republic Act 9165, o ang Comprehensive Dangerous Drugs Act of 2002, nga may kalabotan sa pagbaligya ug paghupot og ilegal nga droga.
Nagpabilin sa kustodiya sa Digos City Police Station ang akusado alang sa tukmang legal nga proseso.
