Patay ang usa ka lalaki human giingong gidunggab sa Purok 6, Upper Panaga, Barangay Sugbay Dos, Pitogo, Zamboanga del Sur, alas 1:15 sa hapon adlawng Lunes, niadtong nakalabay nga adlaw.
Base sa imbestigasyon sa kapulisan, nakit-an ang biktima nga wala nay kinabuhi sa kamaisan nga adunay daghang samad-dinunggaban nga naangkon sa kalawasan. Gikaingon usab nga usa ka 24 anyos nga lalaki ang suspek sa krimen nga misibat dayon human sa maong panghitabo.
Dali usab nga miresponde ang mga sakop sa Pitogo Municipal Police Station human makadawat og report gikan sa usa ka concerned citizen ug gilusad dayon ang hot pursuit operation aron masikop ang suspetsado.
Naghimo na usab ang kapulisan sa crime scene processing ug nakigkoordinar sa mga imbestigador diin gikumpirma sa Rural Health Unit sa Pitogo pinaagi sa post-mortem examination ang kamatayon sa biktima.
Padayon karon ang manhunt operation sa kapulisan samtang nagpadayon usab ang ilang imbestigasyon ug pagpangita og dugang mga testigo alang sa pagpasaka sa angayng kaso batok sa suspetsado.
Photo Courtesy: ZSPPO
