Nagpadayon ang DepEd Region 9 sa pagpalapad sa Expanded Career Progression Program aron mas daghang public school teachers ang makabenepisyo sa promosyon ug career advancement sa Zamboanga Peninsula.
Matud ni DEPED 9 Regional Director Ronelo Al Firmo, gituyo kini sa DEPED 9 aron mosaka ang ranggo ug sweldo bisan magpadayon sila sa pagtudlo ug dili na kinahanglan nga mogawas pa sila sa gawas sa nasud.
Lakip sa mga bag-ong posisyon ubos sa programa ang Teacher IV hangtod Teacher VII, ug Master Teacher V, nga naghatag ug mas daghang oportunidad sa mga kwalipikadong magtutudlo base sa ilang performance, competencies, ug serbisyo.
Giingon ni RD Firmo ang Expanded Career Program kabahin sa padayon nga reporma sa DepEd 9 aron mapalambo ang kalidad sa edukasyon ug mapataas ang moral sa mga magtutudlo pinaagi sa patas nga career progression.
Samtang, gidasig usab niya ang mga kwalipikadong magtutudlo nga magpadayon sa pagpalambo sa ilang kahibalo ug kahanas aron mahimong andam sa mga oportunidad sa Expanded Career Progression Program.
Sa bag-ohay lang nga ikalimang State of the Nation Address (SONA) ni PBBM iyang gipahibalo nga adunay kapin sa 80,000 ka public school teachers ug school heads sa tibuok nasud ang napromote pinaagi sa Expanded Career Progression (ECP) Program.
