Arestado sa buy-bust operation ang usa ka lalaki nga bag-o pa lamang nakagawas sa prisohan, human masakpan sa giingong pagpamaligya og ilegal nga droga sa Purok 2A, Barangay Bading, Butuan City.
Ang nadakpan giila nga si Jerome Espina Anacaya, 22-anyos, walay trabaho, adunay kapuyo ug residente sa Purok 4, Barangay Maon, Butuan City. Giila usab siya sa kapulisan nga usa ka High Value Individual (HVI).
Narekober gikan sa iyang posesyon ang 10 ka sachet sa gituohang shabu nga adunay gibana-banang 800 gramos ug gibanabanaang kantidad nga kapin ₱5.4 milyon, lakip ang ₱50,000 nga buy-bust money, usa ka timbangan sa droga, ug usa ka .45 kalibre nga pistola.
Nasayran usab nga ang suspek nakagawas lamang sa prisohan niadtong miaging bulan, diin nag-atubang kini og kaso sa paglapas sa Republic Act 10591 o Illegal Possession of Firearms and Ammunition.
Ang operasyon gipangunahan sa CDEU, uban sa mga sakop sa Butuan City Police Station 2. Sa pagkakaron, anaa na sa kustodiya sa kapulisan ang suspek ug gikatakdang pasakaan og kaso tungod sa paglapas sa Republic Act 9165 o Comprehensive Dangerous Drugs Act of 2002, ug Republic Act 10591 o Comprehensive Firearms and Ammunition Regulation Act.
Photo Courtesy:BCPS 2
