Gipahigayon sa lokal nga panggamhanan sa Valencia ang seremonyal nga pag-blessing sa dapit nga pagatukoran sa bag-ong Valencia City Hall sa Diversion Road, Barangay Bagontaas niadtong Hulyo 16, 2026.
Ang maong proyekto, nga pondohan pinaagi sa ₱1 bilyon nga bahin sa gi-proseso nga loan sa Landbank, gilauman nga masugdan ang konstruksyon karong Oktubre o Nobyembre ning tuiga human sa pinal nga pag-apruba sa Monetary Board.
Gipangulohan ni City Mayor Amie Galario, Vice Mayor Greizl Galario-Fernandez, ug City Spokesperson Jun Galario ang maong seremonyas uban sa mga lokal nga opisyal ug empleyado sa dakbayan.
Sa iyang mensahe, gipasiugda ni Mayor Galario nga ang maong bag-ong edipisyo magsilbing simbolo sa panaghiusa ug padayon nga tinguha sa iyang administrasyon nga mapalambo ang kalidad ug kaepisyente sa paghatag og serbisyo publiko ngadto sa katawhan.
Sumala sa overview nga gihatag ni Architect John Malaya gikan sa City Engineer’s Office, ang bag-ong City Hall pagatukoron sa lima ka ektaryang yuta ug langkuban sa siyam ka mga building alang sa executive, legislative, ug administrative nga mga opisina.
Gidisenyo kini gamit ang contemporary modern architecture ug sustainable, climate-responsive principles nga nakatutok sa pagdaginot sa enerhiya, kaluwasan, ug paghatag og civic spaces alang sa mga komunidad sa Valencia
Photo Courtesy: Valencia City LGU
