Nagpadayon ang International Monetary Fund (IMF) nga positibo ang forecast niini alang sa ekonomiya sa kalibutan, kung asa, gilauman nga motubo kini og 3 percent sa tuig 2026 ug 3.4 percent sa 2027. Bisan pa sa nagpadayon nga mga hagit sa nagkalainlaing bahin sa kalibutan, nagpabiling lig-on ang pagtan-aw sa IMF sa direksyon sa global economic growth.
Matod sa IMF, usa sa mga nag-unang hinungdan sa maong positibong forecast mao ang kusog nga pagdagsa sa mga pamuhunan nga adunay kalabutan sa artificial intelligence (AI). Ang padayon nga pag-uswag sa teknolohiya, nakahatag og bag-ong oportunidad sa negosyo ug nakatabang sa pagpalig-on sa ekonomiya sa daghang mga nasud.
Bisan pa niini, gipasidan-an sa IMF nga adunay mga peligro nga mahimong makaapekto sa pag-uswag sa ekonomiya, lakip na ang tensyon sa Middle East ug uban pang geopolitical conflicts. Busa, gihangyo niini ang mga nasud nga magpadayon sa maampingong pagdumala sa ilang ekonomiya, aron mapadayon ang kalig-on ug pagtubo sa umaabot nga katuigan.
Photo Courtesy: The High Street Journal
