Gibutyag ni Information Officer I Sydney Santuyo ang nagkalain-laing programa sa Philippine Rubber Research Institute (PRRI) atol sa iyang pagbisita sa Juander Radyo Ipil, nga nagtumong sa pagpalambo sa industriya sa rubber sa Zamboanga Sibugay.
Matud pa niya, ang PRRI nagpadayon sa paghatag og teknikal nga tabang, mga pagbansay, ug impormasyon aron mapataas ang produksiyon ug kalidad sa rubber sa probinsya.
Sumala ni Santuyo, daghan ang mga programa sa PRRI nga mahimong mapahimuslan sa mga rubber farmer ug sa mga gustong mosulod sa industriya.
Lakip niini ang mga seminar sa husto nga pagdumala sa rubber plantation, pagpalambo sa kalidad sa latex, ug mga teknolohiya nga makatabang aron mudako ang ani ug kita sa mga mag-uuma.
Gidasig usab ni Santuyo ang mga mag-uuma, kooperatiba, ug mga lokal nga lider nga makigtambayayong sa PRRI aron mas daghang komunidad sa Zamboanga Sibugay ang makabenepisyo sa mga programa sa ahensya.
Dugang pa niya nga pinaagi sa panaghiusa sa gobyerno ug pribadong sektor, mas mapalig-on pa ang industriya sa rubber ug madugangan ang panginabuhian sa mga lumulupyo sa probinsya.
