Gikumperma ni ICDRRMO Head Armien Alorro nga ipadayon na sa DOST-PAGASA ang pagtukod sa Automated Warning System (AWS) sa dakbayan sa Iligan.
Matud niya, sukad pa sa miaging tuig gisugdan ang maong proyekto ug bag-ohay lang giaprubahan sa Sangguniang Panlungsod ang resolusyon nga giduso ni Councilor Rammil Emborong aron tugotan ang mayor sa pagpirma sa Memorandum of Agreement (MOA) uban sa DOST-PAGASA.
Nahuman na usab ang inspeksyon sa gitakdang lokasyon sa Wet Park, kauban ang City Engineer’s Office ug mga personnel sa DOST-PAGASA.
Sumala ni Alorro, dako ang ikatabang sa AWS sa paghatag og mas paspas ug tukmang mga pasidaan aron mas andam ang mga residente panahon sa kusog nga ulan ug uban pang kalamidad.
