Nakaangkon ug samad bun-og sa lawas ang tulo ka mga indibidwal human sa nahitabong disgrasya atbang sa Ompang Clinic, Rizal Extension, Barangay Central, Mati City, Davao Oriental pasado alas 8:22 sa gabii, Hulyo 9, 2026.
Ang mga nalambigit nga sakyanan usa ka Rusi Macho nga motorsiklo nga gimaneho ni alyas Gian, 17 anyos, estudyante, adunay kapuyo ug residente sa Purok Azucenas, Barangay Sainz ug usa ka Sidecar nga nagtangag ug plakang numero LON281 nga gimaneho ni alyas Eduardo, 59 anyos, minyo ug lumolopyo sa Paradise 1, Madang, Barangay Central. Samtang samaran usab ang pasahero niini nga si alyas Lorna, 64 anyos, minyo.
Base sa inisyal nga imbestigasyon sa kapulisan, nasayran nga ang Rusi Macho nga motorsiklo nagbyahe gikan sa Madang ug padulong sa Barangay Central, samtang ang pedicab nga sakyanan nagbiyahe gikan sa ER Mall ug padulong sa Don Luis, apan pag abot sa lugar sa insidente kalit nga miliko ang pedicab sa wala nga bahin nga miresulta sa ilang panagbangga.
Tungod sa kakusog sa impact, nakaangkon ug kadaot ang duha ka sakyanan ingon man angol ang tulo ka mga indibidwal. Daling naglusad ug rescue operations ang mga personahe sa CDRRMO ug gidala ang mga biktima sa Davao Oriental Provincial Medical Center (DOPMC) alang sa medikal nga pag-atiman.
Sa pagkakaron duha ka sakyanan anaa na sa kustodiya sa kapulisan alang sa tukmang disposisyon.
Photo Courtesy: Mati CPS
