Upat ka mga asosasyon nga gitukod sa mga kanhi rebelde o “Friends Rescued” sa rehiyon sa Caraga ang nakadawat og pondo ubos sa PAMANA Livelihood Program atol sa seremonya sa pagdeklara sa Caraga isip State of Stable Internal Peace and Security (SIPS) nga gipangunahan sa Regional Peace and Order Council (RPOC)-Caraga.
Ang pondo nga gihatag nagkantidad og kapin ₱58 milyon ug gitumong alang sa pagpalig-on sa panginabuhian ug pagtabang sa mga miyembro sa maong mga organisasyon aron makasugod og malinawon ug produktibong panginabuhi.
Matag asosasyon nakadawat og tseke nga nagkantidad og ₱300,000 isip inisyal nga suporta alang sa ilang mga proyekto sa panginabuhian. Lakip sa mga benepisyaryong asosasyon ang United Agusanon Agricultural Workers for Peace and Development PAMANA Livelihood Program Association sa Agusan del Norte, Hugpong sa Nagkahiusang Agsurnon Alang sa Kalinaw ug Kalambuan PAMANA Livelihood Program Association sa Agusan del Sur, SurPeace United Farmers PAMANA Livelihood Program Association sa Surigao del Sur, ug ang United Caraganon for Peace and Development Federation PAMANA Livelihood Program Association.
Ang Payapa at Masaganang Pamayanan (PAMANA) Program usa ka flagship peace and development framework sa gobyerno nga gidumala sa Office of the Presidential Adviser on Peace, Reconciliation and Unity (OPAPRU) ug gipatuman pinaagi sa Department of Social Welfare and Development (DSWD).
Tumong sa programa nga mapalig-on ang mga inisyatibo alang sa kalinaw, rehabilitasyon, ug kalambuan sa mga lugar nga kaniadto naapektuhan sa armadong panagbangi ug sa mga komunidad nga giila nga bulnerable.
Sumala sa mga opisyal, ang maong programa usa ka importante nga lakang aron masiguro ang malungtarong kalinaw ug pag-uswag sa rehiyon pinaagi sa paghatag og oportunidad sa panginabuhian ngadto sa mga kanhi rebelde ug ilang mga pamilya.
Photo Courtesy: DSWD Caraga
