Nakadawat ang 20 ang kanhi miyembro sa New People’s Army (NPA) og Safe Conduct Pass (SCP) atol sa ceremonial awarding nga gipahigayon dungan sa pagdeklara sa Caraga Region ubos sa State of Stable Internal Peace and Security (SIPS).
Ang maong kalihokan gitambongan ni Lt. Gen. Adonis Ariel Orio, Commander sa Eastern Mindanao Command (EastMinCom), National Task Force to End Local Communist Armed Conflict (NTF-ELCAC) Executive Director Undersecretary Ernesto Torres Jr., ug mga miyembro sa Local Amnesty Board (LAB) Butuan.
Ang Safe Conduct Pass usa ka dokumento nga ginahatag sa mga kanhi rebelde samtang ginaproseso pa ang ilang aplikasyon alang sa amnestiya. Pinaagi niini, mapanalipdan sila gikan sa pag-aresto ug matugotan nga gawasnon nga makalihok, makapanarbaho, ug makadawat sa mga serbisyo sa gobyerno.
Sumala sa mga otoridad, ang SCP nagsiguro nga ang mga benepisyaryo dili maaresto, madetine, o mapasakaan og kaso tungod sa mga krimen nga may kalabutan sa ilang politikal nga pagtuo ug kalihokan sa wala pa sila mitahan sa gobyerno.
Dugang pa, pinaagi sa Safe Conduct Pass, gawasnon silang makabiyahe ug makapadayon sa ilang normal nga panginabuhi samtang naghulat sa pinal nga desisyon sa ilang aplikasyon alang sa amnestiya.
Ang maong lakang kabahin sa padayon nga paningkamot sa gobyerno aron mapalig-on ang kalinaw ug seguridad sa rehiyon ug matabangan ang mga kanhi rebelde sa ilang pagbalik sa malinawon ug produktibong kinabuhi.
