Nadakpan ang napulo ka mga wanted person sa gilunsad nga kampanya sa Police Regional Office 11 (PRO-11) batok sa mga pugante sulod sa 24 oras gikan alas-6:00 sa buntag sa Hunyo 16 hangtod alas-5:59 sa buntag sa Hunyo 17, 2026.
Sumala sa datos sa PRO-11, nakapahigayon ang kapulisan og 10 ka operasyon nga nagtumong sa pagdakop sa mga indibidwal nga adunay naglungtad nga warrant of arrest.
Sa maong ihap, usa ka top 10 most wanted person sa lebel sa probinsya o siyudad ang nasikop, samtang unom ka most wanted person sa municipal o station level usab ang nadakpan.
Dugang pa, tulo ka uban pang wanted persons ang naaresto atol sa sunod-sunod nga mga operasyon.
Matud sa PRO-11, ang maong kalampusan kabahin sa padayon nga paningkamot sa kapulisan aron mapanubag ang mga naglikay sa balaod ug mapalig-on ang kalinaw ug kahapsay sa mga komunidad sa tibuok Davao Region.
Gidasig usab sa kapulisan ang publiko nga magpadayon sa pagpakigkoordinar ug paghatag og impormasyon ngadto sa mga awtoridad aron mas mapadali ang pagdakop sa mga wanted person ug masiguro ang kaluwasan sa katawhan.
Photo Courtesy : PRO XI
