Gilunsad sa kagamhanan sa Dakbayan sa Sugbo ang usa ka donation drive aron makatabang sa mga pamilya nga naapektuhan sa magnitude 7.8 nga linog nga miigo sa habagatang Mindanao niadtong Hunyo 8, 2026.
Gidapit ang mga residente sa paghatag og donasyon sa collection point nga nahimutang atubangan sa Legislative Building sa Cebu City Hall. Abli kini matag adlaw gikan alas-6 sa buntag hangtod alas-8 sa gabii ug modawat og donasyon hangtod Hunyo 20.
Gihangyo ni Cebu City Mayor Nestor Archival ang publiko nga magdonar og mga relief goods imbes kuwarta aron mapadali ang paghatod sa tabang ngadto sa mga biktima nga nagpaabot pa sa ayuda.
Lakip sa mga gikinahanglang donasyon ang tubig, bugas, butane, habol, toiletries ug tarpaulin, ilabina alang sa mga pamilyang nag-atubang gihapon sa kakulang sa limpyo nga tubig, pagkawala sa kuryente ug kadaot sa ilang mga puluy-anan.
Human sa donation drive, ihatod ang natigom nga mga relief goods paingon sa General Santos City ug uban pang mga lugar nga grabeng naapektuhan sa linog, ubos sa koordinasyon sa mga lokal nga disaster response teams.
Gisuportahan usab ang maong inisyatiba pinaagi sa P5 milyon nga financial assistance nga giaprubahan sa Cebu City Council niadtong Hunyo 9 alang sa General Santos City. Ang pondo gikan sa Philippine Amusement and Gaming Corporation (PAGCOR) funds sa dakbayan ug gisang-at pinaagi ni Cebu City Councilor David Tumulak, chairman sa Committee on Budget and Finance, sa hangyo ni Mayor Archival.
Photo courtesy: stock.adobe.com
