Dakpan ang usa ka lalaki kinsa nagpayuhot sa ginadiling drugang shabu pinaagi sa gilusad nga drug buy-bust operation sa kapulisan sa Brgy. Turno, Dipolog City niadtong milabayng gabie. Giila ang dinakpan nga si alyas Rock, 45-anyos, minyo, part-time employee sa JNT ug residente sa Brgy. Sta. Felomena, susamang dakbayan.
Nasakmit gikan sa dinakpan ang 1 ka gamay nga pakete sa shabu nga nagsilbing buy bust item ug ang 1,000 peso bill nga gigamit isip buy-bust money. Dugang nasakmit gikan sa iyang posisyon ang duha ka mga pakete sa shabu, smartphone, black pouch nga gigamit isip container sa druga, motorsiklo nga honda click ug driver’s license.
Mokabat sa 4 ka gramo ang nasakmit nga shabu gikan sa dinakpan nga nagkantidad ug Php27,200.00. Gipahigayon sa mga personahe sa ZNPDEU ang maong operasyon sa koordinasyon sa Dipolog CPS ug 5th SOU-MG Mabuhay SBC.
Giturnover ngadto sa ZDN Provincial Forensic Unit ang mga ebidensya alang sa eksaminasyon samtang ang dinakpan mag-atubang sa kasong paglapas sa RA 9165 kon Comprehensive Dangerous Drugs Act of 2002.
Photo Courtesy: Mahisa Shilly
