Nadakpan sa mga otoridad ang usa ka babaye nga giingong namaligya og iligal nga sigarilyo didto sa Purok 7-C, Barangay Sudapin, Kidapawan City. Wala gibutyag ang identidad sa suspek, apan matod ni Barangay Sudapin Kagawad Shirley Madrid, chairperson sa Peace and Order Committee, nakumpiska gikan sa tindahan sa maong babaye ang 25 ka rim sa nagkalainlaing matang sa sigarilyo.
Gidakop ang suspek pinaagi sa hiniusang operasyon sa kapulisan uban sa Kagawad, Purok President, ug mga miyembro sa BPAT.
Gipasakaan usab kini og kaso tungod sa paglapas sa balaod batok sa pagbaligya og iligal nga sigarilyo sumala sa Republic Act 9211. Samtang nakapiyansa na ang maong babaye alang sa iyang temporaryong kagawasan.
Sa kasamtangan, padayon ang panawagan sa mga otoridad ngadto sa publiko nga likayan ang pagpalit ug pagbaligya sa mga iligal nga sigarilyo, aron malikayan ang paglapas sa balaod, ug mapadayon ang kalinaw ug kahapsay sa komunidad.
Photo Courtesy: Flying ketchup
