Nasikop ang napulo (10) ka indibidwal, lakip ang usa ka suspek nga nailhan sa angga nga “Alias Intsik,” atol sa usa ka operasyon sa Panatao Port, lungsod sa Claver, Surigao del Norte.
Gipangulohan ang operasyon sa Criminal Investigation and Detection Group (CIDG) Surigao del Norte Provincial Field Unit (PFU) uban ang suporta sa Regional Maritime Unit 13, Maritime Law Enforcement Team, ug Claver Municipal Police Station.
Kabahin kini sa padayon nga kampanya batok sa ilegal nga kalihokan ubos sa Oplan Ligas sa CIDG. Nadakpan ang mga suspek samtang aktuwal nga nagbalhin og petrolyo nga walay tukmang permit ug dokumento.
Ang usa ka motorized banca o “bote-bote,” nga giingong gipadagan ni Alias Intsik, bag-o lang midunggo nga nagkarga og daghang dram sa diesel fuel.
Gibalhin kini ngadto sa usa ka tanker truck ug gituyo unta nga ipang-apod-apod sa mga gasolinahan sa maong lugar. Sa dihang gisusi sa kapulisan ang operasyon, napakyas ang grupo sa pagpakita og legal nga papeles.
Narekober sa operasyon ang 20 ka dram sa diesel fuel, 30 ka bakanteng dram, duha ka water pump, hose, ang motorized banca, ug tanker truck. Ang kinatibuk-ang balor sa nakumpiska mokabat og kapin ₱5.62 milyon, lakip ang ₱600,000 nga kantidad sa petrolyo ug mga sakyanan ug kagamitan.
Gipasakaan sa kasong paglapas sa Presidential Decree No. 1865 batok sa mga suspek.
