Gilusad na sa City of Talisay Traffic Operations and Development Authority ang pagpangita sa usa ka rider nga nasakpan sa video nga nagbanking samtang nagbiyahe sa Tabunok Flyover, nga hapit makabangga og laing sakyanan.
Sa bidyo nga gi-upload sa netizen nga si Lyzzel Joy Alipio-Repuelo, klarong makita ang delikado nga lihok sa rider nga mura’g nag-exhibition paingon sa habagatang bahin sa Sugbo, hinungdan nga nabalaka ang ubang motorista nga kadungan niini sa dalan.
Matod ni Jonathan “Joy” Tumulak nga nadawat na sa ilang opisina ang reklamo kabahin sa maong insidente ug ilang giisip kini nga kaso sa reckless driving.
Nakigkoordinar na usab ang CT-TODA sa Land Transportation Office Region 7 aron mailhan ang rider ug mapatawag kini alang sa hustong aksyon.
Gipasidan-an ni Tumulak ang publiko batok sa ingon nga klase sa pagmaneho, nga dili lang makasamok sa dalan kondili mahimong hinungdan sa disgrasya ug peligro sa kinabuhi sa ubang mga motorista.
