Gitan-aw karon sa kagamhanan sa Dakbayan sa Sugbo ang posibilidad nga himuong rainwater catchment facilities ang Fuente Osmeña Circle ug Abellana Oval, sumala sa mga opisyal sa dakbayan.
Matod ni Cebu City Mayor Nestor Archival, nakuha ang ideya gikan sa ilang bag-ong trade mission sa Tokyo, Japan, diin nakita nila ang mga parke nga adunay underground systems nga nagkolekta ug nagtipig sa tubig-ulan.
Ang maong plano gitumong aron makatabang sa pagpakunhod sa pagbaha panahon sa kusog nga ulan, samtang maghatag usab og dugang tinubdan sa tubig panahon sa hulaw.
Dugang sa mayor nga ang panginahanglan sa pagtuon sa ubang posibleng tinubdan sa tubig sama sa Mananga River ug Lusaran Dam aron masiguro ang dugayng suplay sa tubig sa dakbayan.
Nipakita usab og suporta ang business sector sa maong inisyatiba. Sumala ni Regan Rex King, presidente sa Cebu Chamber of Commerce and Industry (CCCI), ilang gipalihok ang pag-apil sa plano sa mas lapad nga paningkamot sa rehabilitasyon sa Fuente Circle.
Iyang gihisgutan nga kaniadto, ang Fuente usa ka tinubdan sa tubig, hinungdan nga angay kini alang sa modernong catchment system nga magtipig sa tubig-ulan ug magamit sa panahon sa hulaw sama sa El Niño.
Nag-andam na usab ang CCCI og pormal nga proposal lakip ang detalyadong pagtuon, ug nangita og suporta gikan sa mga partner.
Bisan pa niini, gipasabot sa mga opisyal nga anaa pa sa planning stage ang proyekto ug magkinahanglan og kooperasyon ug pondo aron matuman.
Photo Courtesy: Alamy
