Giinspeksyon nila ni Department of Agriculture secretary Francisco P. Tiu Laurel Jr. ug Department of Public Works and Highways (DPWH) Secretary Vince Dizon ang usa ka farm-to-market road sa Braulio E. Dujali, Davao del Norte isip kabahin sa nasudnong audit sa mga proyekto sa dalan pang-agrikultura.
Kini nga lakang gihimo human ibalhin sa Department of Agriculture (DA) ang responsibilidad sa pagdumala sa maong mga proyekto.
Moabot sa 800-metros nga konkreto nga dalan sa Prk. 6, Barangay New Casay, BE Dujali nga nahuman niadtong bulan sa Hulyo sa nilabay nga tuig ang gihatagan og pagtagad sa nasyonal nga panggamhanan.
Gilauman nga makatabang kini sa pagpaayo sa pagbiyahe sa mga mag-uuma, pagpaubos sa gasto sa transportasyon, ug pagminus sa post-harvest losses sa ilang mga produkto.
Sa pagkakaron, ang maong dalan nagsuporta sa dul-an 50 ektarya nga yutang agrikultural nga gitamnan og humay, lubi, saging, ug utanon, ug gilauman pang madugangan og 40 ektarya nga posibleng mapahimuslan sa mga lumulopyo.
Gipasiugda ni Tiu Laurel nga importante ang maong audit aron masiguro nga ang mga proyekto tinuod nga nakatabang sa mga mag-uuma. Samtang, gipadayag sa DA nga dako pa ang kakulang sa farm-to-market roads sa nasud, uban sa kapin 60,000 kilometro nga wala pa matukod.
Nasayran nga alang sa 2026, gidoble ang badyet niini ngadto sa Php33 bilyon aron mapadali ang dugang proyekto, nga gilaumang makatabang sa pagpalambo sa produksyon ug kita sa sektor sa agrikultura.
