Tungod sa padayong pagsaka sa presyo sa produktong petrolyo, mihimo og mga lakang ang kapulisan sa Sugbo aron makadaginot sa ilang konsumo sa gasolina ug krudo.
Matod ni Cebu City Police Office information officer Police Lieutenant Colonel Franco Rudolf Oriol, nagpagawas og direktiba si Police Colonel George Ylanan nga likayan ang pag-usik sa krudo sa paggamit sa mga mobile unit.
Sa adlaw, gimando nga palungon ang makina ug blinkers sa patrol cars ug manggawas ang mga personnel. Sa gabii, gitugotan ang pag-andar sa makina ug blinkers sa roving patrol, apan dili na gamitan og aircon.
Gipasabot ni Oriol nga adunay mga gi-adjust nga standby points ug gi-implementar ang energy conservation measures base sa memorandum nga gi-isyu sa city director.
Bisan niini, gipahibalo nga wala pa usba ang gas allocation sa kapulisan, apan gikinahanglan ang pagdaginot tungod sa kahimtang sa suplay sa petrolyo.
Gipasalig sa kapulisan nga dili maapektuhan ang ilang peace and order program ug magpadayon ang dali nga pagresponde sa mga emerhensya.
Sa pagkakaron, misaka ang presyo sa krudo ngadto sa Php120 matag litro, samtang kapin sa Php100 ang gasolina.
