Nasikop sa Police Station 6 – Gensan ang usa ka lalaki nga giila isip Most Wanted Person niadtong nakalabay nga adlaw. Ang operasyon gipahigayon sa Brgy. Bula, dakbayan sa Gensan.
Giila ang suspek sa alyas nga “BORDOK”, hamtong ang pangidaron ug residente sa nahisgutang lugar. Ang pagdakop pinasikad sa Warrant of Arrest nga giisyu sa korte tungod sa kaso sa paglapas sa Republic Act 7610 (Special Protection of Children Against Abuse, Exploitation and Discrimination Act), partikular sa Section 5(b) nga may kalabutan sa pagpamalit og sekswal nga materyal gikan sa usa ka menor de edad.
Gipangulohan ni PMAJ Adolf Julien Dave Diaz, Station Commander sa Police Station 6, ang operasyon ug gisiguro nga gipahibalo ang akusado sa iyang mga katungod pinaagi sa Miranda Rights sa pinulongan nga iyang nasabtan.
Sa pagkakaron, anaa na ang suspek sa kustodiya sa kapulisan alang sa saktong dokumentasyon sa dili pa itugyan ngadto sa korte.
