Gipahigayon ang cash gift distribution sa Dipolog City ngadto sa 123 ka mga benepisyaryong senior citizens sulod sa maong dakbayan subay sa RA 11982 o ang “An Act Granting Benefits to Filipino Octagenarians and Nonagenarians” nga gipahigayon sa D’ Food Hub and Events Center, Barangay Miputak, niadtong Marso 16, 2026.
Gipasiugdahan ang nasangpit nga programa sa National Commission of Senior Citizens (NCSC-RO-9) inubanan sa Office of the Senior Citizens Affairs (OSCA) ug sa Kagamhanang Lokal sa dakbayan pinaagi sa City Social Welfare and Development Office (CSDWO), diin nasayran nga ilawom ning programa, ang mga benepisyaryo ang nakadawat sa 10,000.00 ka pesos matag usa, samtang ang usa ka centenarian ang makadawat sa 100,000.00 ka pesos.
Gitambongan ang maong kalihukan nila ni OSCA Head, SancenCaroro, City Social Welfare and Development Officer, Patrick Jalapadan uban sa mga kawani sa mga nasangpit nga buhatan ug mga representante gikan sa NCSC Region IX, sa pagpanguna nila ni Project Development Officers, Nemia Algar ug Michelle Luna, nga maoy nangulo sa pagpang apod-apod sa nahisgutang mga cash gift.
Pinaagi niini, naghatag usab kini og dungog ug pag-ila sa mga edaran nga nagserbisyo ug sa ilang kontribusyon ngdto sa pagpalambo sa komunidad sulod sa daghang katuigan.
Subay ning maong kalamboan, kadtong mga senior citizens nga gusto mopahimulos niining maong programa, ang gi-awhag sa pagbisita lamang didto sa buhatan sa OSCA nga nahimutang sa Barangay Sta. Isabel sa maong dakbayan alang sa tukmang impormasyon.
Photo Courtesy: Dipolog City Government
