Patay ang magtiayon human maaksidente ang ilang gisakyan nga motorsiklo sa Barangay Sumilihon Butuan City niadtong nakalabay nga adlaw.
Ang mga biktima giila nga sila Romeo Felicilda ug Amor Felicilda, nga parehong residente sa Barangay Dulag. Base sa inisyal nga report sa Butuan City Police Station 6, nagbiyahe ang magtiayon gikan sa Cabadbaran City sakay sa usa ka Suzuki Smash nga motorsiklo.
Apan pag-hidangat sa Purok 2A sa Barangay Sumilihon, kalit kining mibangga sa konkretong bahin sa poste kilid sa dalan nga hinungdan sa grabeng kadaot sa ilang lawas.
Dali silang gidala sa Butuan Medical Center, apan gideklarar nga dead on arrival sa attending physician.
Sa pagkakaron, ang mga patayng lawas sa duha ka biktima gipahiluna na sa ilang mga kabanay, samtang padayon ang imbestigasyon sa kapulisan aron matino ang hinungdan sa maong aksidente.
