Nasikop sa kapulisan ang usa ka street-level individual atol sa buy-bust operation nga gipahigayon sa Municipal Drug Enforcement Unit sa Bansalan Municipal Police Station sa Purok Waling-waling, Barangay Tubod, Bansalan, Davao del Sur niadtong nakalabay nga adlaw.
Naila ang nadakpan nga si alyas “Andot,” 23-anyos, ulitawo ug construction worker nga residente sa Purok Bukang Liwayway, Barangay Rizal sa maong lungsod.
Narekober sa operasyon ang tulo ka sachet sa ginadudahang shabu, lakip ang buy-bust item nga gibaligya sa poseur buyer, nga adunay gibug-aton nga 0.3 grams ug gibanabana nga kantidad nga dos mil kwarenta pesos.
Nasakmit usab sa kapulisan ang buy-bust money, usa ka OPPO nga cellphone, ug pakete sa sigarilyo nga nakit-an sa suspek.
Sa pagkakaron, anaa na sa kustodiya sa kapulisan ang nadakpan samtang ginahimo ang dokumentasyon ug pagpasaka sa kaso batok kaniya tungod sa paglapas sa Republic Act 9165 o ang Comprehensive Dangerous Drugs Act of 2002.
