Nasakmit sa Philippine Drug Enforcement Agency (PDEA RO-13), ang kapin sa ₱95 milyones nga kantidad sa ilegal nga droga sa usa ka interdiction operation nga gipahigayon niadtong nakalabay nga adlaw sa Lipata Port, Barangay Lipata, Surigao City.
Sa maong operasyon, nadakpan ang 23-anyos nga drug courier nga residente sa Napindan, Taguig City. Narekober gikan sa posisyon niini ang 14 ka pakete sa gituohang shabu nga gibug-atong 14 kilos, nga nagkantidad og ₱95,200,000.
Gawas sa ilegal nga droga, nakuha usab sa mga operatiba ang usa ka metallic gray nga Toyota Hilux, usa ka android cellphone, ug usa ka ligid (tire) nga gigamit sa pagtago o pagbiyahe sa kontrabando nga droga.
Ang nadakpan nga suspetsado atubangon ang kasong paglapas sa Section 5 o Transportation of Dangerous Drugs ubos sa Comprehensive Dangerous Drugs Act of 2002 o Republic Act No. 9165.
