Aprobado na sa konseho 10th Sangguniang Panlungsod syudad sa Malaybalay ang 13 pesos nga pletehan sa mga motorela atol sa ika-18 regular session niadtong Marso 10, 2026.
Kini pinaagi sa ordinansa nga nag-amendar sa Section 4 sa Fare Matrix and Pakyaw System Ordinance diin Php10.00 ang gitagana nga pletehan sa motorela sugod niadtong 2023.
Sa report sa Committee on Transportation sa konseho pinaagi ni City Councilor Brian Nelson Flores, gihatagan ug gibug-aton nga tungod sa pagsaka sa presyo sa gasolina busa makatarunganon usab matod pa nga usbawan ang pletehan.
Ilawom sa giamyendahan nga Fare Matrix, Php13.00 na ang regular nga pletehan, samtang Php10.00 ang pletehan sa mga estudyante, PWDs, ug Senior Citizens. Magdugang usab og Php1.00 sa mga pasahero nga padulong sa Landing Area sa Barangay Casisang sa dakbayan
Human sa makuting deliberasyon sa konseho, hiniusang gipasar sa konseho ang maong usbaw sa pletehan nga gihangyo sa Malaybalay City Federation of United Motorela Operators and Driver’s Association Inc. (MACFUMODA)
Hinuon, kung padayon ang pagsaka sa presyo sa gasolina, magpatawag usab og lain nga Public Hearing ang komitiba aron hisgutan ang posibleng laing hugna sa usbaw sa pletehan.
Photo Courtesy: SP Malaybalay
