Posibleng tugotan nga ipatuman sa Department of Labor and Employment (DOLE) Zamboanga del Sur sa mga pribadong kompanya nga magpatuman og flexible work arrangements, kung adunay mutual agreement tali sa employer ug sa mga empleyado.
Kini nunot sa gipatuman nga four-day work week sa pipila ka buhatan sa gobyerno aron makatabang sa pagminus sa konsumo sa gasolina ug kuryente.
Sa interview sa Juander Radyo News Team kang Yusep Abduhasad, Senior LEO III sa DOLE Zamboanga del Sur, iyang giingon nga adunay nay daang polisiya ang gobyerno sukad pa sa panahon sa pandemic nga nagtugot sa mga alternatibo ug flexible work arrangements alang sa mga pribadong kompanya.
Dugang pa ni Engr. Abduhasad, nga ang flexible work arrangement usa ka opsyon nga mahimong gamiton sa mga kompanya aron ma-adjust ang oras ug pamaagi sa trabaho sa ilang mga empleyado.
Apan, gipatin-aw niini nga gikinahanglan gihapon nga makompleto ang 48 hours nga trabaho sulod sa usa ka semana.
Mahimo kining ipatuman sa 5 ka adlaw nga trabaho, pinaagi sa compressed o flexible schedule, apan kung molapas sa gitakdang oras sa trabaho, kinahanglan magbayad ang employer og overtime pay sa mga empleyado.
Giawhag usab sa opisyal sa Department of Labor and Employment ang mga pribadong kompanya nga makig-coordinate sa ilang buhatan aron masiguro nga ang implementasyon sa flexible work arrangements subay sa balaod ug makahatag gihapon sa hustong proteksyon sa mga empleyado.
