Usa ka Pinoy nga seaman nga giilang si George Francis Miranda, 46-anyos residente sa Capalonga, Camarines Norte, ang wala pa makit-i human nga maigo sa duha ka missile ang gisakyan niini nga barko nga nagbyahe sa Strait of Hormuz niadtong Marso 6. Ang barko nga gisakyan giingong motabang unta sa usa ka container ship nga naigo usab sa missile duha ka adlaw ang milabay.
Sumala sa pamilya ni Miranda, nakig video call siya sa iyang pamilya niadtong Marso 5 ug miingon nga delikado ang lugar nga ilang biyahion. Giingon usab sa iyang asawa nga wala nila masayri nga didto diay sila padulong sa delikadong lugar.
Nakadawat lang matod pa ug gamay nga impormasyon ang pamilya kabahin sa nahitabo sa gisakyan ni Miranda, apan walay klarong update ang pamilya gikan sa kompanya ug mga ahensya kung unsay kahimtang sa maong seaman ug kung buhi paba kini.
Kalabot niini, gipadayag sa International Maritime Organization (IMO) nga upat ka tawo ang napatay sa pag-igo sa maong barko apan wala pa gipahibalo ang mga pangalan niini.
Kahibaloan nga delikado karon ang Strait of Hormuz tungod sa tensyon tali sa Iran ug US/Israel diin nagpataas sa kakuyaw sa mga barko nga moagi sa maong area.
Photo Courtesy: YouTube
