Giaprobahan sa Department of Education (DepEd), ang upat ka adlaw nga work week alang sa non-teaching personnel nga makatrabaho onsite matag semana sugod niadtong adlaw’ng Marso 9, 2026.
Sumala sa memorandum nga gipagawas ni Education Secretary Sonny Angara niadtong Marso 8, ang Biyernes itudlo isip standard work-from-home day para sa tanang sakop sa polisiya.
Nunot kini sa direktiba ni Presidente Ferdinand Marcos Jr. nga ipatuman ang mga lakang sa pagtipig sa enerhiya sa tanang buhatan sa gobyerno, tungod sa pagsaka sa presyo sa lana nga may kalabutan sa kagubot sa Middle East.
Naglangkob ang polisiya sa non-teaching ug related teaching personnel, lakip ang contract-of-service ug job order employees, samtang ang mga magtutudlo magpadayon sa ilang regular nga klase ug uban pang aktibidad.
Dungan sa upat ka adlaw nga onsite arrangement, nimando usab ang DepEd sa mga lakang sa pag-save sa enerhiya aron makunhuran ang konsumo sa kuryente ug gasolina sa 10% ngadto sa 20%.
Kini naglakip sa pagbutang sa mga air condition ngadto sa 24°C, paggamit sa sleep mode sa mga ekipo, pagpalong sa wala kinahanglan nga mga suga ug electronics sa opisina panahon sa paniudto ug human sa trabaho, ug paggamit sa mga hagdanan imbes sa mga elevator.
Gimando usab sa DepEd nga ang mga inter-agency meetings, consultations, ug conferences himuon sa virtual platforms gawas kung gikinahanglan, ug ang opisyal nga pagbiyahe limitado sa importante o kritikal nga mga katungdanan kung dili mahimo ang online meetings.
Photo Courtesy: Esquire Philippines
