Gihatagan og gibug-aton sa Integrated Provincial Health Office Zamboanga del Sur (IPHO) ang kamahinungdanon sa pag-ila sa papel sa kababayen-an isip kabahin sa pagsaulog sa National Women’s Month karong bulan sa Marso.
Matud ni Dahlia Aseniero, Health Education and Promotion Officer (HEPO) sa IPHO Zamboanga del Sur nga ang maong kasaulogan nagdala sa tema nga We For Gender Equality Inclusive Society aron maila ang dakong kontribusyon sa kababayen-an diha sa lain-laing sektor sa katilingban.
Gihatagan ug gibug-aton ni Aseniero, ang pagpalig-on sa mga programa nga nagpanalipod sa kahimsog ug kaayohan sa kababayen-an, lakip ang paghatag og impormasyon bahin sa maternal health, reproductive health, ug uban pang serbisyo sa panglawas padayon nga napahimuslan sa kababayen-an sa lalawigan.
Dugang pa niya, sa karon ang Provincial Government of Zamboanga del Sur padayon nga nagtabang sa pagpalambo sa kahimtang sa kababayen-an pinaagi sa lain-laing health programs nga ilang gitanyag atol sa Women’s Month.
Ang National Women’s Month ginasaulog matag bulan sa Marso aron pag-ila sa katakos, ug kontribusyon sa kababayen-an sa pagpalambo diha sa trabahoan ug sulod sa pamilya.
