Nadakpan sa gilusad nga joint manhunt operation sa kapulisan ang usa ka suspek nga nalista isip Top 9 Most Wanted Person sa provincial level ug Top 6 sa municipal level sa Kiblawan, Davao del Sur.
Ang operasyon gipahigayon sa mga operatiba sa Kiblawan Municipal Police Station niadtong nakalabay nga adlaw sa Barangay Kimlawis, Kiblawan, Davao del Sur. Ang dinakpan nailang si alyas Aron, 29-anyos, minyo ug mag-uuma, residente sa nahisgutang lugar.
Gidakop ang supetsado pinaagi sa warrant of arrest alang sa duha ka ihap sa kasong frustrated murder nga gipagawas ni Acting Presiding Judge Marie Fe Orig-Maloloy-on sa RTC Branch 18, Digos City niadtong November 18, 2023.
Ang operasyon gihimo sa Kiblawan Municipal Police Station uban sa nagkalain-laing police units lakip ang DSPPO Tracker Team, CIDG Davao Sur PFU, RID 11, RSOG 11, 2nd DSPMFC, 1104th RMFB, DSPPO PIU ug RIU11 PIT–Davao Sur.
Sa pagkakaron, anaa na sa Kiblawan Municipal Detention Facility ang suspek samtang naghulat sa sunod nga mando sa korte, ug mahimo siyang makapiyansa og ₱200,000 alang sa iyang temporaryong kagawasan.
Samtang, giingon ni PCol. Leo T. Ajero, nga magpadayon ang kampanya sa kapulisan batok sa mga wanted persons aron mapadayon ang kalinaw ug kahapsay sa komunidad.
