Nadakpan sa kapulisan sa Padada Municipal Police Station ang Top 1 Most Wanted Person sa provincial level atol sa gipahigayon nga Simultaneous Anti-Criminality Law Enforcement Operation o SACLEO.
Ang nadakpan mao si Resmundo Ballecud Solomon, 51-anyos, mangingisda ug residente sa Purok 2, Barangay Piape, Padada, Davao del Sur.
Base sa report, alas 10:34 sa buntag niadtong Marso 6, nadakpan ang suspek sa Lower Banualan, Barangay Tambler, General Santos City, pinaagi sa joint operation sa Padada MPS Tracker Team uban sa ubang police support units.
Giatubang sa suspek ang walo ka kaso sa Qualified Rape of a Minor ubos sa Article 266-A ug 266-B sa Revised Penal Code, ug gi-isyu ang warrant of arrest nga walay piyansa pinaagi sa mando ni Family Court Presiding Judge Maria Fe Orig-Malololoy-On sa Digos City.
Sa pagkakaron, anaa na sa kustodiya sa Padada Municipal Police Station ang suspek samtang padayon ang legal nga proseso batok kaniya.
