Nadala sa tambalanan ang usa ka 29-anyos nga lalaki human kini gipusil sa iyang silingan nga nahitabo sa Purok Kawayan, Sitio Nazareth, Barangay Buenavista, Pagadian City, kagahapon, Marso 8, 2026.
Sa inisyal nga imbestigasyon, samtang anaa sulod sa iyang balay ang biktima kalit nga miabot ang 35-anyos nga suspetsado ug nikompronta sa biktima kabahin sa gikaingong pagpanlabay ug bato sa iyang balay sa nakalabayng gabie.
Ang panaglalis misangpot sa pagpamusil sa suspetsado ngadto sa biktima nga dali ra usab gidala sa tambalanan aron madapatan sa dinaliang medikasyon. Samtang nadakpan ra usab dayon sa gilunsad nga hot pursuit operation sa kapulisan ang suspetsado nga mihimo sa pagpamusil sa biktima.
Na-recover sa kapulisan ang kalibre 45 nga pistola nga gituohang gigamit sa suspetsado lakip na ang usa ka bala sa gituohang kalibre sa pusil.
Nakakustudiya na karon sa buhatan sa Pagadian City Police Station ang suspetsado aron atubangon ang kaso nga ipasaka batok kaniya.
Photo Courtesy:Onlanka
